العراق الواحد
يا صاح حب الوطن فك الشعر بابلــي
معروف من الأصل غيره وعزم بابلي
حبيت كل الـوطـــن مافـرقت بابلــــي
بابلنه منهـــا انفتح كَلبــــي اتجـه واسطـه
حـب الوطـن بلكَلب ياصاحبــــي واسطـه
امن البصرة اني أتخذ للوحده جن واسطه
وحدته ترفع علم يمحـي الحـرب بصـــرة
لوجنت منصف صدك اخذ الوضع بصرة
بس ادري اني البشر بعض البشـر بصرة
تعمي البصر بلقسـط جي منفتح ديونـــي
للوحده اقسم يضــل من الشعــر ديونــي
للقـادسـيه انتمي ومنهــا انســب ديونــي
من يوم بيه اسمعت من الشعـــر شطــره
قناص يرمي العدوا ويناصر ال شطـــره
لوشال سيفه وركض معروف اظن شطره
لو شطر شطرة علي من يشطر ومثنــه
واحدهـــم من العــزم يتقـــدر ب مثنــه
طـيب وصبر منعرف سماوي ابن مثنه
كلما كَصاه الزمن وبصدره ضم كـربله
ونخلاتـه ماحـملــن ذب النخــل كـربله
لابد يزال الحزن من يعتني ال كـربله
لو زاد هذا الزمن من همـه فوكَي علــــي
وهناك لارض النجف اوصل لحضرة علي
بلحضره كَلبي اليرف من الفرح جن علي
يعله الكَلب بلصحن من اكَصد لسامره
جي ماكَدرت اوصلـه دنياتـي لسـامره
اكعد معا بلشعر وهنـاك ضل ســامره
مـعروف من نايلـه مــن تكصـد ارمــادي
لاتنفخ اعلى الجمر صن ..يحركَ ارمادي
ابيــض كَلبهــم يضل لاتحســب ارمــادي
بلطيب دوم انوصف بغدادي ابن عاصمه
بغدادي عن الخبث رب العرش عاصمه
للماعشــك حبهم مالــك شغــل عاصمــه
ولعاصي امـه ركـــض علتفرقه شمالــــه
صدكَني يـوم الحشـر كتب الالـه شمالـــه
كاتف عـــراق الصمد ضد البغي شمالــه
ينعاد وجه الوطـــن من يبتدي عمــاره
ماريد بيت وقصـر لاردت انه عمــاره
لانبار رايد تـون من تصــرخ عمــاره
حرب الطوائف لــون بات بجزء موصـل
عــربيد جـايـك يسـم لاهــذا ابـد موصــل
وحدتنه بيها العـزم خل ترجع ل موصـل
من موصل الكَه الفرح عند الشعب خالص
لديالــى راح اتجـه واوصل بلـد خـالــص
وهناك الكَه الحزن كـل الحــزن خالــص
الخميس فبراير 12, 2009 4:23 pm